”SpaceX” və “Tesla” şirkətlərinin rəhbəri Elon Mask kütləvi informasiya vasitələrində yayılan informasiyaların səhihliyini yoxlamaq üçün yeni xidmət yaradacağını elan edib.
İş adamı bunu “Twitter”də yazıb. Onun yeni xidmət üçün ad seçimi çox maraqlıdır – Pravda.
“Elə bir sayt yaratmağa hazırlaşıram ki, ictimaiyyət onun köməyi ilə istənilən məqalənin mötəbərliyini öyrənsin və hər jurnalistin, redaktorun və nəşr olunan məlumatın etimad reytinqini izləmək imkanına malik olsun. Adını Pravda qoymağı düşünürəm”, – deyə E. Mask yazıb.
İş adamı bildirib ki, xidmət “bot”lardan qorunmalı və dezinformasiya üçün “bot ordusu”ndan istifadə edən hər kəsi axtarıb ifşa etməlidir. E. Mask öz səhifəsində belə bir saytın nə dərəcədə zəruri olduğunu öyrənmək üçün səsvermə də təşkil edib. (Bu xəbər hazırlanarkən səsverməyə 431 mindən çox istifadəçi qatılmış və onların 87 faizi belə bir xidmətə ehtiyac olduğunu bildirmişdi.)