Əsas səhifə Biznes “Dünya bazarında 6 ton Azərbaycan balı satılıb”

“Dünya bazarında 6 ton Azərbaycan balı satılıb”

1395
Paylaş

“Azərbaycandakı arıların 98-99%-i cins arılarıdır ki, bunlar Bozdağ Qafqaz və Sarı Qafqaz cinsinə aid olan arılardır. Qalan 1-2% Ukrayna və Almaniya mənşəli arı ailələridir”.

Bu barədə kənd təsərrüfatı naziri Heydər Əsədov bildirib.

Onun sözlərinə görə, nazirlik gələcəkdə təbii və süni mayalanma, genofondun artırılması yolları ilə ana arı istehsalını artırmaq və onları fermerlərə paylamaq niyyətindədir. “Yalnız ötən il 10 minə yaxın ana arı paylanılıb”, – deyə H.Əsədov vurğulayıb.

Nazir bildirib ki, dünya üzrə illik bal istehsalı 1,5 mln. tondur: “Hesablamalara görə, 2020-2022-ci illərdə bu tələbatın kəskin sürətdə artacağı, 2-2,5 mln. ton arasında zərurət yaranacağı bildirilir. Azərbaycanda istehsal olunan bal digər ölkələrdəki baldan fərqlənir. Məlumat üçün bildirim ki, ötən il dünya bazarında 6 ton Azərbaycan balı satmışıq ki, bu da 8000-8500 dollar dəyərində olub. Bizim ballar daha orqanik olduğu üçün dünya bazarına çıxışı daha asandır. Qeyd edim ki, dünya bazarında digər ballarla yanaşı orqanik bala olan tələbat ümumi tələbatın 15-20%-ini təşkil edir”.

H.Əsədov deyib ki, yaxın vaxtda arıçılığa dövlət dəstəyinin artırılması ilə bağlı prezidentə təkliflərimiz təqdim olunacaq: “Biz bunu Arıçılar Assosiasiyası ilə birgə müzakirə etmişik”.

“Hal-hazırda arı ailələrinin sayı 3000 təşkil edir və 6000-ə yaxın insan bu işlə məşğul olur. Qısa müddətdə bu işlə məşğul olanların sayının on iki min nəfərə, bal istehsalının 8-10 tona çatdırılmasını nəzərdə tuturuq”, – deyə o qeyd edib.

©APA