Mikrobloqlar xidməti Twitter bildirib ki, istifadəçilərin ikifaktorlu identifikasiya və ya digər təhlükəsizlik tənzimləmələri üçün qeyd etdikləri poçt ünvanları və telefon nömrələrindən səhvən reklam nümayişi üçün istifadə edib. Neçə nəfər istifadəçinin bu səhvlə üzləşdiyi məlum deyil.
Problem, Twitter-in Tailored Audiences reklam sisteminə görə olub. Bu sistem, reklamçılara elektron poçt ünvanları və ya telefon nömrələri əsasında yaradılmış kütləvi istifadəçi siyahısı üzrə reklam xidmətinin nizamlanmasını həyata keçirməyə imkan verir.
Twitter aşkar edib ki, reklamçılar marketinq siyahısını yükləyəndə sistem onları istifadəçilərin ikifaktorlu identifikasiya üçün istifadə etdikləri telefon nömrələri və elektron poçt ünvanları ilə uyğunlaşdırıb.
“Bu bir səhv olub və biz buna görə üzr istəyirik” – Twitter-də bildiriblər.
Problemdən nə qədər istifadəçinin ziyan çəkdiyi bilinməsə də onların şəxsi məlumatlarının reklamçılara və üçüncü şəxslərə ötürülmədiyini qeyd ediblər. Problem 2019-cu ilin 17 sentyabrında aradan qaldırılıb.