ABŞ sakini lotereya biletində səhvə yol versə də, 13,6 min dollar qazanıb.
Bu barədə UPİ informasiya portalı məlumat yayıb.
Kanzas ştatının Uiçito şəhər sakini Rik Forman “Racetrax” virtual at yarışlarında ilk dəfə iştirak etdiyini etiraf edib.
“Bəxtimi sınamaq istədim. Oyun kartını alıb, bir yürüşə dörd dollar qoydum. Ancaq səhvə yol verdim, çaşıb 10 yürüşə pul qoydum”, – deyə amerikalı xatırlayır.
Xəta etdiyini öyrənsə də, qərarını dəyişməyib və iştirak üçün elə 40 dollar ödəyib. Nəticədə, Forman cekpotun qalibi olub.
“Dördüncü yürüş ən uğurlu olub. Bu səhvə yol verməsəydim, qalib olmayacaqdım”, – deyə o izah edir.
Mükafatı aldıqdan sonra onunla yığılmış borclarını bağlamağı, yerdə qalan hissəsini gələcək üçün saxlamağı planlaşdırır. Ancaq qalibiyyət onun oyuna olan tamahını artırıb. O bundan sonra da virtual ippodromda oynamağa davam edəcəyini bildirib.