“Apple” şirkəti Avropada koronavirusun ən sürətlə yayıldığı İtaliyada pərakəndə satış mağazalarından birinin fəaliyyətini müvəqqəti dayandıracaq. İtaliya hökumətinin “COVID-19” epidemiyasının yayılmasına qarşı mübarizə tədbirləri ilə əlaqədar olaraq şirkət dövlətə kömək etmək qərarına gəlib.
Berqamo əyalətində yerləşən “Apple Oriocenter” mağazası İtaliya hökumətinin fərmanına uyğun olaraq martın 7-8-də bağlı olacaq. Bu barədə məlumat “Apple” şirkətinin rəsmi regional saytında yerləşdirilib.
Ötən həftə Nazirlər Şurasının rəhbəri tərəfindən verilən fərmana görə, bu istirahət günlərində bütün böyük və orta mağazalar, o cümlədən ticarət mərkəzlərindəki kiçik ticarət nöqtələri bağlanacaq. Fərman, Berqamo, Kremona, Lodi və Pyaçensa əyalətlərinə də şamil edilib.
Analoji fərmanla əlaqədar fevralın 29-da və martın 1-də “Apple il Leone”, “Apple Fiordaliso” və “Apple Carosello” mağazalarının işi dayandırılıb.
İtaliya Mülki Müdafiə Agentliyinin məlumatına görə, son 24 saat ərzində ölkədə koronavirusdan ölənlərin sayı 27 nəfər təşkil edib, onların ümumi sayı isə 79-a çatıb.