Hesab.az portalının sahibi “GoldenPay” ASC-nin İdarə Heyətinin sədri dəyişib: Fərid İsmayılzadəni Naina Mehdiyeva əvəz edib.
“Marja” xəbər verir ki, bunu Fərid İsmayılzadə açıqlayıb.
“Azərbaycanın ən böyük onlayn ödəmə şirkəti “GoldenPay”in gələcək inkişafı ilə bağlı bu gün mühüm qərarlar qəbul etdik. Bu gündən etibarən, mən İdarə Heyətinin sədri kimi cari idarəetmə ilə deyil, Müşahidə Şurasının üzvü kimi strateji idarəetmə və inkişaf işlərində fəal iştirak edəcəyəm. İdarə heyətini digər tərk edən üzvü Elvin Mirzayev oldu.
Bundan sonra İdarə Heyəti sədri vəzifəsinə isə çox etibar etdiyim Naina Mehdiyevanı təyin etdik. Naina xanım şirkətdə 11 ildir işləyir və onun inkişafında müstəsna rolu olmuşdur. O bu günədək əməliyyatlar sahəsinə cavabdeh şəxs və İdarə Heyəti sədrinin birinci müavini olub”.
İdarə Heyətinə digər yeni təyinat isə Tugba Ucardır. Tuğba xanım ABŞ-da və Türkiyədə aparıcı şirkətlərdə çalışmışdır. Türk Telekom, TTNET və digər tanınmış şirkətlərin marketinq və məhsulların inkişafı bölmələrində aparıcı vəzifələrdə işləmişdir. Hazırda isə GoldenPay-də İdarə Heyəti üzvü kimi məhsulların inkişafı və marketinq sahələrinə cavabdeh olacaq.
Mahammadiya Abdurahimov isə İdarə Heyətinin digər üzvü kimi Texniki işlərlə məşğul olmağa davam edəcəkdir.
“Əziz dostlar, bu dəyişikliklər GoldenPay-in idarəetmə komandasını daha da gücləndirəcək. Biz yaxın vaxtlarda Sizi yeni imkanlar və daha böyük nailiyyətlərlə sevindirəcəyik”,- F.İsmayılzadə bildirib.