Maliyyələşdirmə qidanın çatdırılması, mobil ödənişlər və digər bu kimi xidmətlərin inkişafına sərf olunacaq.
Cənub-Şərqi Asiyanın ən böyük taksi xidməti olan Grab, SoftBank-ın Vision Fund fondundan 1,46 milyard dollar cəlb edib. Raundun ümumi dəyəri 4,5 milyard dollar təşkil edib, digər investorlar arasında Microsoft, Toyota və Hyundai Motor şirkətlərin adları çəkilir.
Softbank-dan aldığı investisiyalardan sonra, Grab-ın qiymətləndirməsi 14 milyard dollara çatıb. Bu haqda CNBC-ə müqavilənin detalları ilə tanış olan mənbə xəbər verib. 2018-ci ilin avqust ayında şirkət 11 milyard dollar dəyərində qiymətləndirilmişdir.
Grab cəlb etdiyi sərmayələri digər sahələrin inkişafına istiqamətləndirəcək. Taksi xidmətindən əlavə olaraq, şirkət ərzaqların çatdırılması, mobil ödəniş və digər maliyyə xidmətlərini göstərir.
Şirkət yeni investisiya raunduna 2018-ci ilin yazında, Cənub-Şərqi Asiyada Uber və UberEats müəssisələrini əldə etdikdən sonra başlayıb. Bunun qarşılığında, Uber, şirkət səhmlərinin 27%-ni almışdır.