Əsas səhifə Xəbərlər Ümumi iqtisadi xəbərlər Azərbaycanın şərab şirkəti kiçilib, gəliri kəskin azalıb

Azərbaycanın şərab şirkəti kiçilib, gəliri kəskin azalıb

76
Paylaş

“Göyçay Şərab” ASC 2018-ci ili 408 min manat xalis mənfəət ilə başa vurub. 2017-ci illə müqayisədə şirkətin xalis mənfəəti təxminən 4,7 dəfə artıb. ASC 2017-ci ili 86 min 848 manat xalis mənfəət ilə bağlamışdı. Mənfəətin artması “Göyçay Şərab”ın satışlarının artmasından deyil, xərclərinin kəskin azalmasından qaynaqlanıb. 

SATIŞ AZALIB

“Marja” ASC-nin maliyyə hesabatlarına istinadən xəbər verir ki, 2017-ci illə müqayisədə 2018-ci ildə “Göyçay Şərab”ın əsas əməliyyat gəliri 3,6 dəfə azalaraq 4 milyon 414 min manata düşüb. 2017-ci ildə ASC-nin əsas əməliyyat gəliri 15 milyon 855 min manat təşkil etmişdi.

Şirkətin əməliyyat xərcləri isə 15 milyon 746 min manatdan 3 milyon 904 min manata geriləyib (4 dəfə azalıb). Xərclər daha çox azaldığından “Göyçay Şərab”ın əməliyyat mənfəəti 2017-ci illə müqayisədə 2018-ci ildə 4,7 dəfə çox – 510 min manat təşkil edib. Şirkət əməliyyat mənfəətindən 102 min manat mənfəət vergisi ödəyib, beləliklə, ötən il 408 min manat xalis mənfəət ilə bağlanıb.

ŞİRKƏT KİÇİLİB

31 Dekabr 2018-ci il tarixində “Göyçay Şərab” ASC 6 milyon 966 min manat cəmi aktivlərə, 3 milyon 895 min manat cəmi öhdəliklərə, 3 milyon 71 min manat cəmi kapitala malik olub. ASC 2017-ci ilin sonunda 9 milyon 241 min manat cəmi aktivlərə, 6 milyon 469 min manat cəmi öhdəliklərə və 2 milyon 772 min manat cəmi kapitala malik idi.  Ehtiyatların azalması aktivlərin, kreditor borclarının və digər öhdəliklərin azalması isə cəmi öhdəliklərin azalmasına səbəb olub. Ötən ilin mənfəəti ilə əlaqədar olaraq şirkətin cəmi kapitalı artıb.