Avropa Komissiyası antiinhisar qanunvericiliyini pozduğuna görə “Google” rəhbərliyini 11 milyard dollar cərimələyə bilər.
İKT.lent.az-ın məlumatına görə, bu barədə “Financial Times” nəşri öz mənbələrinə istinadən xəbər verib.
Nəşrin məlumatına görə, hələlik cərimənin dəqiq həcmi və qərarın nə zaman qəbul ediləcəyi məlum deyil. Ancaq qeyd edilir ki, bu, yaxın həftələr ərzində baş tutacaq.
Avropa Komissiyasının fikrincə, “Google” rəhbərliyi özünün “Android” əməliyyat sistemlərinə lisenziyalaşdırma şərtlərini yerləşdirməklə antiinhisar qanunvericiliyini pozub. Bununla da şirkət özünün onlayn axtarış sistemlərinə üstünlük verib və rəqiblərinin maraqlarını pozub.
Korporasiya 11 milyard dollar həcmində cərimələnə bilər. Bu isə onun illik gəlirinin 10 faizinə bərabərdir.