Çexiyanın antivirus proqramçısı Avast 2013-cü ildən bəri istifadəçilərin internet fəaliyyəti barədə məlumatları toplayıb üçüncü tərəflərə satır. Bu barədə Forbes yazır.
Forbes qeyd edir ki, Avast-ın təxminən 400 milyon istifadəçisi var. Onun baş direktoru aydınlıq gətirərək bildirib ki, burada söhbət gizli məlumatların satışından getmir.
Onun sözlərinə görə, Avast istifadəçilərin aktivliyinə brauzer genişlənməsinin köməyi ilə nəzarət edir. Sonra məlumat Jumpshot şirkəti tərəfindən təhlil edilir.
Müştərilərə çatan məlumatlar – bir saytdan digərinə keçmiş istifadəçilərin say faizi kimi məlumatlardır. Forbes deyir ki, belə məlumatlar reklam şirkətlərinə nəzarət etmək üçün faydalıdır.
Jumpshot saytında deyilir ki, mütəxəssislər istifadəçilərin nəyi axtarışa vermələri, müəyyən məhsul və ya brendlə necə qarşılıqlı fəaliyyətdə olmaları, nə aldıqları barədə ətraflı məlumatlar təqdim edə bilərlər. Məlumatlar ölkə, kateqoriya və ya domen üzrə təqdim edilir.
Qeyd edək ki, Avast-ın rəhbərinin sözlərinə görə, internet fəaliyyətlə bağlı məlumatların satışı ümumi gəlirdən təxminən 5% gətirir. Forbes bildirir ki, 2019-cu ilin ilk altı ayı ərzində şirkətin gəliri 430 mln. dollar olub.