Sahibkar bir neçə İT-şirkətin yaradıcısıdır.
Amerikalı milyarder, filantrop və ABŞ prezidentliyinə keçmiş müstəqil namizəd Ross Pero 89 yaşında, Texasdakı evində vəfat edib. Bu barədə Pero ailəsinə istinadən Reuters məlumat verir.
O, leykemiyadan ölüb. Bu xəstəliklə 2019-cu ilin fevralından mübarizə aparırdı.
Henry Ross Pero 1930-cu il 27 iyunda Texas ştatının Teksarkana şəhərində anadan olub.
O, ABŞ Hərbi-dəniz akademiyasında oxuduğu vaxt komputerlərlə ilk dəfə tanış olur.
1962-ci ildə Pero öz şəxsi Electronic Data Systems şirkətini yaradır. EDS komputer avadanlıqları təchizatı və verilənlərlə iş xidməti ilə məşğul olub.
1988-ci ildə Pero Perot Systems şirkətini qurur. O, İT- infrastruktura inkişafı üzrə xidmətlərlə bağlı ixtisaslaşmış bir şirkət olub.
Pero həmdə Steve Jobs-un 1985-cildə əsasını qoyduğu NeXT Computers-in əsas investoru olub. Bu şirkətə Pero 20 milyon dollar yatırım edib.
Pero həmçinin iki dəfə ABŞ prezidentliyinə müstəqil namizəd olub. 1992-ci il seçkilərində o, seçicilərin 18,9% səsini qazanıb. 1996-cı ildə isə 8% səs topladı.
2000-ci ildə Pero siyasəti buraxdı və filantropiya ilə məşğul olmağa başladı. 2019-cu ilin aprelində Forbes jurnalı Peronun mülkünü 4,1 milyard dollar dəyərləndirdi.